Hamdardi k Do Bol

0
150

Ye kahani mard hazraat k liye nahe hai… na hi ye kahani un larkion k liye hai jo apnay susral mein bohat khush hein…ye kahani un k liye bhi nahe hai jo combined family system ki strong supporter hein…
Ye kahani sirf merey jesi larkion k liye hai…jo “SeLf pity” ka shikar hon
Baat ye nahe hai k mein susral mein na-khush hun.. baat ye bhi nahe hai k mujhe office se ja k 16 rotian pakani parte hein to mein is liye ro rahe hun..
Baat sirf meri aur Ali ki hai…baat bus itni si hai k sometimes I feel like hating him..

Aap soch saktay hein k aik “Working” bahu subah uthh k nashta bananay kitchen mein bhagay.. aur wahan raat k ganday bartan paray hon.. aur wo ye sochay k pehley nashta banaye ya bartan dhoye.. phir wo apnay Jeth aur shohar k liye nashta banaye.. Jeth k liye table set karay.. aur apnay shohar ka nashta tray set kar k 2nd floor pe bhagay..
Wahan ja k minnaten kar k apnay shohar ko uthaye k plz jaldi uth jaayen chaye thandi horahe hai.. phir bhag bhag k shohar k farmaishi kapray istri karay.. boot polish karay.. phir bhagum bhaag kamra seedha karay k agar saas ne peechey se chakkar lagalia to 100 baaten sunayen gi k phela hua kamra chhor k jaati hai..
Abhi kaam khatam bhi na ho k office van horn pe horn de.. aur wo apna bag utha k bhaag jaaye..
aur uska shohar “Khuda Hafiz Gurya” to kahay lekin ye bhi note na karay k bivi ne to nashta hi nahe kia..!

Kisi k liye ahem ye nahe k mein ne nashta kia ya nahe..lekin saas k liye ye ahem zarur ho k “Ali ne subah doodh piya thha ya nahe”??!
Jub betey office se wapas aayen to un se ziada thaka hua koi nahe.. un k liye foran paani pesh kia jaaye..unka manpasand khana fatafat garam kiya jaaye.. aur bahu job se ghar aaye to atay k saath hi sub k liye chaye banaye!
Mard hazrat jo meri kahani ki pehli hi line mein tanbeeh k bawajud ye kahani dheeton ki tarhan parhay jarahay hein.. zarur soch rahay hon gay k itni musibat hai to JOb chhor do bhaye!
Lekin yehi to baat hai.. k ye “musibat” job karney wali bahu pe bhi hai aur job na karney wali bahu pe bhi hai..
kabhi mein sochti hun k apney aap ziada tars khaon jo job se ja k thakan k bawajud ghar k kaam karte hai ya apni Jithani pe ziada tars khaon jo maheenay k 4 haftay.. haftay k 7 din aur din k 24 ghantay kamon mein lagi rehti hein.. aur harf-e-shikayat zaban pe nahe laateen.

Job karney waali aur job na karney waali.. dono bahu’on k liye jub koi harf-e-tareef hi nahe to mein job aakhir kiun chorun..!?
Koi mehmaan ghar aaye to hamari shamat..! Sunday ko agar 10 bajay uthen to itni baaten sunen.. koi is pe shabashi nahe deta k pura hafta 6 bajay uthti hai jub sub so rahay hotay hein… lekin itwar ko 10 bajay uthna sub ko bura lagta hai… Hum kaheen ghoomnay jayen tub bhi shamat k jo jo ghar pe ruk rahay hein un k khanay ka intezam karo aur itna thak jaao k kaheen janaya ka dil hi na rahay.. khana jub table pe lag jaye to subki farmaaishen suno k”ye to mein nahe khata”.. aur saas bajaye betey ko dantnay k.. khana khati bahu ko foran kahen k jao isay piyaaz wala anda bana do.. aur kisi ko bhi “Bhabi” pe tars nahe aaye..
Agar additional kamon k liye aik maid rakhnay ki sugestion do to “Job ka rob jhaar rahe hai”.. aur kabhi mein available na hun aur saas ko rotian pakani par jayen to aik second mein betey bhaag k bahar se rotian ley atay hein..subah se raat tuk aap kaam kartay rahen to saas khush..! kisi din sirf salad bhi na bani ho to mood kharab!

Aap shayad soch rahay hon gay k mein ‘self pity’ ka shikar hun..aap bilkul ghalat nahe soch rahay.. kiun k mein waqai self pity ka shikar hun.. aur aisa hota hi hai.. jub koi doosra aapki diljoi na karay to aap khud ba khud apnay aap se baaten karnay lagtay hein..mein apney aap ko dilasa bhi deti hun.. roti bhi hun.. aur aansu bhi khud ponchti hun..haan mein waqai self pity ka shikar hun!
mein ye nahe keh rahe k ali badal gaye hein.. wo wesey k wesey hi hein.. wo ab bhi kehtey hein “aao yaar icecream kha k atay hein”….”chalo gi walk karnay?”.. .”is weekend seaview pe dinner pakka”… lekin merey muskura k nahi mein sir hilanay pe ab kabhi ye nahe kehtay k “Saira! Yaar tum bohat badal gaye ho” !

Agar koi aaj mujh se poochay k tum chahti kia ho.. to mera jawab bohat mukhtasir aur clear hoga..!
“HAMDARDI k sirf 2 BoL”..!!

SHARE
Previous articleMANGNI KA LADDU

LEAVE A REPLY

Please enter your comment!
Please enter your name here